KASISIUR MAMBONGOLI PILANDUK BAJAGA MALAM

            Kasisiur batamu lawan pilanduk, kasisiur tahu pada bahwa pilanduk suwah mambongoli buhaya. Ujar kasisiur “kita bakukuatan bajaga malam yu??” “akur” ujar si pilanduk, ujar kasisiur “kita bajaga malam di atas pohon dipinggir sungai” “ayu!” ujar pilanduk.

               Pada malam hari maka naiklah pilanduk ka atas pohon, dan baduduk diatas dahan nang taganal, si kasisiur dipucuk nang karing haja, balum sampai tangah malam mangantuk pilanduk lalu tagugur ka banyu mancabau, mandangar mancabau basuara ai kasisiur “mangantuk kah duk??” “iih yurai” ujar pilanduk, “bongol, kanapa kada bapingkut” ujar kasisiur, “aku...aku kalapasan bapingkut” ujar pilanduk, maka manggigil lai pilanduk kadinginan. Limbah tangah malam parak subuh tagugur pulang si pilanduk, takajutai pulang kasisiur sambil baucap “napa, bongol banar ikam tuh, maka pintar pandir,  pintar mambongoli orang, tapi bajaga malam kada sanggup!!” kada saling suara’an lagi pilanduk kadinginan.

             Limbah sudah siang batakun nai pilanduk lawan kasisiur “apa rahasianya jadi kuat bajaga malam??”  ujar kasisiur “aku kada bajaga malam tadi, aku guring tarusai, ikam tagugur kabanyu haja nang aku tajaga duk ai” lalu pilanduk malihati muha kasisiur, ujar kasisiur “aku duk ai kada kawa babancilak kada kawa jua bapajam, aku kaya ini pang mataku” ujar pilanduk “jadi ikam kasisiur guring haja lah malam tadi di atas ranting nang karing, ikam kada gugur lah??” “iih” ujar kasisiur. “Kalau kaya itu dibongolinya aku oleh kasisiur” ujar pilanduk “mata kasisiur tu dasar kaya itu, guring lawan kada guring sama haja” ujar pilanduk dalam hatinya “aku haja tapakalah lah lawan kasisiur” ujar pilanduk “tagugur kabanyu bajaga malam dibongoli oleh kasisiur. “Wassalam”

Raja Ading Nih??